کورنیو چارو وزارت د نیمروز ولایت له پولې ایران ته غیرقانوني سفر ممنوع اعلان کړ.
په نیمروز کې امنیتي چارواکي وايي، چې د کورنیو چارو وزارت د حکم پر بنسټ، په دغه ولایت کې ایران ته د سفر ټولې ناقانونه لارې تړل شوې دي.
ورته وخت کې د نیمروز ولایت د کډوالو او راستنېدونکو چارو رییس وایي چې د کورنیو چارو وزارت د لارښوونې پر بنسټ، نورو هېوادونو ته په ناقانونه توګه د هېوادوالو پر سفر بنډیز لګېدلی او ټولو پوله ساتو ځواکونو ته یې لارښوونه کړې چې ګاونډیو هېوادونو ته د هېوادوالو د ناقانونه تګ مخه ونیسي.
د نیمروز ولایت د کډوالو او بېرته را ستنېدونکو چارو رییس صدیق الله نصرت وویل:«افغانستان د جوړېدو په لور روان دی او افغانان دې هڅه وکړي چې خپله انرژي په خپل هېواد کې مصرف کړي او دا موضوع د دوی د خوشحالۍ او عزت لامل کېږي.»
د کاپيسا ولایت اوسېدونکی محمد نبي له خپلې مېرمنې او درېیو ماشومانو سره نیمروز ته راغلې او غواړي له ناقانونه او قاچاقي لارو ایران ته ولاړ شي.
هغه درې ورځې کېږي چې له خپلې کورنۍ سره د زرنج ښار په یوه هوټل کې ایران ته د تلو لپاره په تمه دي خو پوله یې پر تړلې ده.
وزګاري او بې وزلي هغه لاملونه دي چې محمد نبي یې اړ کړی ترڅو د ایران پر لور له خپلې کورنۍ سره ناقانونه او له خطرونو ډک سفر غوره کړي.
د کاپیسا اوسېدونکی محمد نبي څرګندوي:«د ویزې او پاسپورټ د اخیستو وس مو نه درلود، اوس چې نیمروز ته راغلي یوو، وايي چې اسلامي امارت مرز یې تړلی دی. له دغو ماشومانو سره چېرته ولاړ شوو.»
یو شمېر نور ځوانان چې دوی هم غواړي په ناقانونه او قاچاقي لارو ایران ته لاړ شي، د پولې د تړلو په غبرګون کې وایي، که د سرپرست حکومت مسوولین ورته په کور د ننه د کار زمینه برابره کړي، هېڅکله به دومره له خطره ډکه لار غوره نه کړي.
د کاپیسا اوسېدونکی حشمت الله هم څرګندوني:«د کار زمینه نشته، هېچا ته کار نه پیدا کېږي او ټول اړ دي چې د نفقې د پيدا کولو لپاره سفر وکړي او چېرته ولاړ شي.»
د کاپیسا بل اوسېدونکی فقیر احمد وايي:«راضي نه یوو چې له هېواده چېرته ولاړ شوو؛ خو اړ یوو.»
دا په داسې حال کې ده چې له تېرو نهو میاشتو راهیسې نیمروز ولایت د ډله ییزې کډوالۍ په پوله بدل شوی چې د بې وزلۍ او وزګارۍ له کبله د خطرونو په منلو سره غواړي په ناقانونه لارو ایران ته واوړي.
